ទីងៗ ទីងៗ
ភ្លើងចរាចរណ៏សំរាប់អ្នកដំណើរថ្មើរជើងកំពុងតែស្ថិតក្នុងភ្លើងបៃតង
រេឡារត់ត្រហេបត្រហបឆ្លងផ្លូវខ្លាចខកខានមិនទាន់ ដែលកំពុងស្ពាយកាតាបសាក់កាដូពណ៍ផ្ទៃមេឃបែកប្រផេះ
ដៃម្ខាងកាន់អាវធំពណ៍ផ្កាឈូកខ្ចី
និងដៃម្ខាងទៀតកាន់ខ្នើយពណ៍លឿងទុំស្រស់រូបក្បាលតុក្កតាកូនឆ្កែស្នូបភី (Snoopy)។ ជាមួយមុខសស្រស់ សក់ក្រាស់វែងទំលាក់ដល់ចង្កេះតែមិនរញ៉េរញ៉ៃ
សក់មុខរៀបចំសមរម្យអាចឲ្យឃើញមុខបានច្បាស់ ចិញ្ចើមគូសខ្វង់ បបូរមាត់ពណ៍ទឹកក្រូចស្រាល
ពាក់អាវកតាំងពណ៍ស ខោខ្មៅគូថវែងនិងស្បែកជើងពណ៍ទឹកក្រូចដូចបបូរមាត់ រេឡាមើលទៅរាងស្រស់បន្តិចដែរ។
ដើរតំរង់ក្លោងទ្វារក្រុមហ៊ុន
មានបុគ្គលិកម្នាក់ឃើញរេឡាពីចំងាយ គាត់មើលនាងដោយប្រយោលស្របពេលគាត់ឡើងជណ្តើរ
ក៏ជំពប់ជើងប៉ិះនិងដួល។ រេឡាធ្វើជាមិនចាប់អារម្មណ៍តែក៏បានញញឹមដាក់បងប្រុសម្នាក់នោះបន្តិចជាការគួរសមព្រោះជាបុគ្គលិកស្គាល់គ្នា
ដែលបែបនេះបែរជាធ្វើឲ្យគាត់សើចស្ទាក់ស្ទើររាងអៀនហើយក៏ឡើងជណ្តើរជើងជំនួសជណ្តើរយន្តទៅបាត់។
កំពុងធ្វើការ មានឯកសារតំរូវធ្វើឡើងវិញ
រេឡាបានខលប្រាប់ហើយបុគ្គលិកនោះក៏យកឯកសារមកឲ្យម្តងទៀតតែរេឡាមិននៅ ដូចច្នេះបុគ្គលិកផ្សេងទៀតព្រមទទួលឯកសារជំនួសរេឡា
តែបុគ្គលិកម្នាក់នោះមិនព្រមឡើយ ចាំរហូតទាល់តែជួបរេឡា។
គ្រប់គ្នាគិតថាគាត់ប្រហែលមានការសំខាន់អីត្រូវនិយាយជាមួយរេឡា តែតាមពិតគ្មានទេ
បុគ្គលិកម្នាក់នោះគ្រាន់តែចាំរេឡា ហុចឯកសារឲ្យនាងហើយញញឹមញញែម ក៏ចេញទៅបាត់ទៅ។
ហេហេហេហេ!
ល្ងាចបន្តិច បងប្រុសផ្នែកបង្វឹកការងារ
ចូលមកប្រកាសប្រាប់បុគ្គលិកឲ្យកុំភ្លេចទៅចូលរៀន គាត់មើលរេឡារាងភ្ញាក់បន្កិចហើយក៏ដើរចេញទៅ។
រេឡាទទួលអារម្មណ៍ថាគាត់និងងាកមុខមកមើលនាងម្តងទៀត ពិតប្រាកដមែន
គាត់ក៏ងាកមកមើលនាងម្តងទៀតមែនដែលធ្វើឲ្យរេឡាសើចស្ញាញព្រោះវាដូចអ្វីដែលនាងបានគិត
តែការដែលនាងសើចបែបនេះបែរជាធ្វើឲ្យបងប្រុសផ្នែកបង្វឹកការងារគិតថានាងសើចដាក់
ក៏សើចស្រស់មករកនាងវិញ។
ថ្ងៃបន្ទាប់ កំពុងឈរចាំជណ្តើរយន្ត តីងៗ
ជណ្តើរយន្តបើកភ្លាម បុគ្គលិកដែលឈរចាំដែរនាំគ្នាប្រញាប់ដើរចូល
រេឡាក៏ទុកឲ្យគេទៅមុនព្រោះគិតថាពេញទៅហើយ បុន្តែបុគ្គលិកម្នាក់ញញឹមហៅនាងចូលម្នាក់ទៀត។
រេឡាក៏ដើរចូល ដែលបុគ្គលិកម្នាក់នោះក៏និយាយតិចៗតែម្នាក់ឯងថា
ឲ្យតែឃើញស្រីស្អាតឈរចាំជណ្តើរយន្ត ចេះតែអាណិត ហេហេហេ (គាត់សើច)។
ចៃដន្យមានបុរសម្នាក់ទៀតលឺ ក៏ឆ្លើយឆ្លងថា គេស្អាតគេមានម្ចាស់ចិត្តបាត់ទៅហើយ!
បុរសមុខញញឹមក៏បន្តថាមានម្ចាស់ចិត្តគឺមាននៅផ្ទះ នៅផ្ទះរបស់គេ នៅក្រៅរបស់យើង
(ហើយគាត់ក៏ដៀងភ្នែកមើលរេឡា ---ញញឹមទៀតហើយ---)។
រេឡាកំពុងរត់ឡើងជណ្តើរក៏ពើបនិងបុគ្គលិកម្នាក់ទៀត
គាត់និយាយមកកាន់រេឡាថា អេ! ជួបគ្នាទៀតហើយ! (ជាមួយទឹកមុខប្រឹមប្រៃ)។
រេឡាកំពុងរកនឹកថាជួបគ្នានៅឯណា ក៏នឹកឃើញថាបានជួបគ្នានាពេលឈប់ម៉ូតូចាំស្តុបឆ្លងផ្លូវ!
កាលពេលឈប់ចាំស្តុប រេឡាគិតថាប្រហែលជាគាត់ច្រឡំមនុស្ស តែដោយគាត់សើចដាក់នាងទៅហើយ
នាងក៏សើចដាក់វិញតិចៗ។ តាមពិតទៅគឺគាត់ប្រហែលស្គាល់នាងតាមរយះការណែនាំពីក្រុមរបស់នាង
ថានាងជាបុគ្គលិកថ្មី។
បើបងប្រុសម្នាក់នោះវិញនិយាយថា រេឡាឆាមម៉ីង (Charming) ព្រោះពេលនាងនិយាយម្តងៗ សំលេងគួរឲ្យចង់ស្តាប់
មុខញញឹមស្រស់ថែមទាំងថ្ពាល់ខួចទៀតផង ទាក់ទាញ!
អ្នកទាំងអស់គ្នាហាក់ស្វាគមន៏រេឡាដោយរួសរាយរាក់ទាក់
ពួកគេហាក់ចូលចិត្តមើលនាង តែមិនដឹងចូលចិត្តមើលនាងដោយយល់ថានាងស្អាត រឺយល់ថានាងចម្លែកទេ ព្រោះនាងគឺ70គីឡូក្រាម!
មើលទៅមិនមែនធាត់លំៗទេ! ហាហាហា
Comments
Post a Comment